മരണപ്പെട്ട റസൂലുകളോട് അല്ലാഹു ചോദിക്കാൻ പറയുന്നതെങ്ങനെ ശിർക്കാവും?

മരണപ്പെട്ട റസൂലുകളോട് അല്ലാഹു ചോദിക്കാൻ പറയുന്നതെങ്ങനെ ശിർക്കാവും?

ഒരു സഹോദരൻ:

وَاسْأَلْ مَنْ أَرْسَلْنَا مِنْ قَبْلِكَ مِنْ رُسُلِنَا أَجَعَلْنَا مِنْ دُونِ الرَّحْمَٰنِ آلِهَةً يُعْبَدُونَ

മുഹമ്മദ് നബിയോട് അല്ലാഹു ഖുർആനിൽ കൂടെ,, അങ്ങയ്ക്കു മുമ്പ് നമ്മുടെ,റസൂലുകളായി  നാം അയച്ചവരോട് അങ്ങ് ചോദിച്ചു നോക്കുക. പരമകാരുണികന് പുറമെ ആരാധിക്കപ്പെടേണ്ട വല്ല ദൈവങ്ങളേയും നാം നിശ്ചയിച്ചിട്ടുണ്ടോ എന്ന്‌.

മുൻ കഴിഞ്ഞ പ്രവാചകന്മാരോട് ചോദിച്ചു ഉറപ്പ് വരുത്തുക എന്ന ആശയം ആണല്ലോ ഇത് 

എന്താണ് ചോദിക്കാൻ പറയുന്നത്  അല്ലാഹുവല്ലാത്ത വല്ല ആരാധ്യ വസ്തു നാം ഏർപ്പെടുത്തിയ.. ? ഇതാണ് ചോദ്യം ?

അതിൽ നിന്ന് തന്നെ വ്യക്തമാണ് ചോദ്യം മുൻ കഴിഞ്ഞ, അതായത് വഫാത്തായിപ്പോയ  പ്രവാചകന്മാരോട് ചോദിക്കാൻ അല്ലാഹു പരിശുദ്ധമാക്കപ്പെട്ട ഖുർആനിൽ കൂടെ പറയുന്നു, മരണപ്പെട്ട മഹാന്മാരോട്,സഹായം ചോദിക്കാൻ അതായത് (ഇസ്തിഗാസ) ചെയ്യാൻ അതുകൊണ്ടാണല്ലോ ഖുർആൻ നബിയെ മുൻ കഴിഞ്ഞുപോയവരോട് അങ്ങ് ചോദിക്കുക എന്നു പറഞ്ഞത് ഈ ഖുർആൻ  നീ അംഗീകരിക്കുന്നുണ്ടോ..?

എന്റെ മറുപടി: 

(താഴെ തഫ്‌സീർ തബരി).

( وَاسْأَلْ مَنْ أَرْسَلْنَا مِنْ قَبْلِكَ مِنْ رُسُلِنَا ) في قراءة ابن مسعود: "سَلِ الَّذِينَ يَقْرَءُونَ الْكِتَابَ مِنْ قَبْلِكَ" يعني: مؤمني أهل الكتاب.

"നിനക്ക് മുമ്പ് നാം അയച്ച നമ്മുടെ ദൂതന്മാരോട് ചോദിക്കുക" എന്ന ആയത്തിന് ഇബ്നു മസ്ഊദിന്റെ ഖിറാഅത്തിൽ: "നിനക്ക് മുമ്പ് കിതാബ് വായിക്കുന്നവരോട് ചോദിക്കുക" എന്നാണ്.

അതായത്: വേദക്കാരിൽ വിശ്വാസികളായവരോട് ചോദിക്കുക എന്നർത്ഥം.

( وَاسْأَلْ مَنْ أَرْسَلْنَا مِنْ قَبْلِكَ مِنْ رُسُلِنَا ) إنما معناه: فاسأل كتب الذين أرسلنا من قبلك من الرسل, فإنك تعلم صحة ذلك من قبلنا, فاستغنى بذكر الرسل من ذكر الكتب, إذ كان معلوما ما معناه.

"ഇതിന്റെ അർത്ഥം:

നിനക്കു മുമ്പ് അയക്കപ്പെട്ട റസൂലുകളുടെ ഗ്രന്ഥങ്ങളോട് ചോദിച്ചുനോക്കുക എന്നതാണ്. അപ്പോൾ ഞങ്ങളുടെ ഭാഗത്തുനിന്നുള്ള ഈ സന്ദേശത്തിന്റെ സത്യാവസ്ഥ നീ അറിയും. റസൂലുകളെ പരാമർശിച്ചതിലൂടെ അവരുടെ ഗ്രന്ഥങ്ങളെയാണ് ഉദ്ദേശിച്ചിരിക്കുന്നത്. ഉദ്ദേശ്യം എന്താണെന്ന് വ്യക്തമായതിനാൽ ഗ്രന്ഥങ്ങളെ പ്രത്യേകം പറയാതെ റസൂലുകളെ മാത്രം പരാമർശിച്ചിരിക്കുന്നു."

ഇവിടെ ഇമാം ത്വബരി رحمه الله വ്യക്തമാക്കുന്നത്, "റസൂലുകളോട് ചോദിക്കുക" എന്നത് നേരിട്ട് മരണപ്പെട്ട റസൂലുകളെ വിളിച്ച് ചോദിക്കുക എന്നല്ല; അവരുടെ ഗ്രന്ഥങ്ങളിൽ അന്വേഷിക്കുക എന്നാണെന്നതാണ്.

(താഴെ തഫ്‌സീർ അൽ-ബഗവി)

وقال أكثر المفسرين : سل مؤمني أهل الكتاب الذين أرسلت إليهم الأنبياء هل جاءتهم الرسل إلا بالتوحيد ؟ وهو قول ابن عباس في سائر الروايات ، ومجاهد وقتادة والضحاك والسدي والحسن والمقاتليين . يدل عليه قراءة عبد الله وأبي : " واسأل الذين أرسلنا إليهم قبلك رسلنا " ، ومعنى الأمر بالسؤال التقرير لمشركي قريش أنه لم يأت رسول ولا كتاب بعبادة غير الله - عز وجل - .

"മിക്ക തഫ്സീർ പണ്ഡിതന്മാരും പറഞ്ഞത്: പ്രവാചകന്മാരെ അയക്കപ്പെട്ടിരുന്ന അഹ്‌ലുൽ കിതാബിലെ വിശ്വാസികളോട് ചോദിക്കുക; റസൂലുകൾ തൗഹീദ് (ഏകദൈവാരാധന) അല്ലാതെ മറ്റെന്തെങ്കിലും സന്ദേശവുമായാണോ അവരുടെ അടുക്കൽ വന്നത് എന്ന്.

ഇതാണ് ഇബ്നു അബ്ബാസ് رضي الله عنه യിൽ നിന്ന് വന്ന എല്ലാ റിപ്പോർട്ടുകളിലുമുള്ള അഭിപ്രായം. മുജാഹിദ്, ഖതാദ, ദഹ്ഹാക്, സുധ്ദി, ഹസൻ, മുകാതിൽ എന്നിവർ പറഞ്ഞതും ഇതുതന്നെയാണ്.

ഇതിന് തെളിവാണ് അബ്ദുല്ലാഹ് (ഇബ്നു മസ്ഊദ്) യുടെയും ഉബയ്യ് (ഇബ്നു കഅബ്) യുടെയും ഖിറാഅത്ത്:

'നിനക്കു മുമ്പ് നാം റസൂലുകളെ അയച്ചവരോട് ചോദിക്കുക' എന്നത്.

ഇവിടെ ചോദിക്കാൻ കൽപ്പിച്ചതിന്റെ ഉദ്ദേശ്യം ഖുറൈശിലെ മുശ്രിക്കുകളെ ബോധ്യപ്പെടുത്തുകയും അവരുടെമേൽ തെളിവ് സ്ഥാപിക്കുകയും ചെയ്യലാണ്. കാരണം, ഒരു റസൂലും ഒരു വേദഗ്രന്ഥവും അല്ലാഹുവല്ലാത്ത മറ്റാരുടെയും ആരാധനയുമായി വന്നിട്ടില്ല."

ഈ ഉദ്ധരണി വളരെ വ്യക്തമായി കാണിക്കുന്നത്, ആയത്തിന്റെ അർത്ഥം മരണപ്പെട്ട പ്രവാചകന്മാരോട് ചോദിക്കുക എന്നല്ല; മറിച്ച് അവരിലേക്ക് അയക്കപ്പെട്ടിരുന്ന വിശ്വാസികളായ അഹ്‌ലുൽ കിതാബിനോട് ചോദിച്ച് എല്ലാ പ്രവാചകന്മാരും തൗഹീദിലേക്കാണ് വിളിച്ചതെന്ന് ഉറപ്പുവരുത്തുക എന്നതാണ്.

കൂടാതെ, തഫ്സീറിന്റെ അവസാന ഭാഗം പ്രത്യേകിച്ച് പറയുന്നത്:

"ഒരു റസൂലും ഒരു ഗ്രന്ഥവും അല്ലാഹുവല്ലാത്ത മറ്റാരുടെയും ആരാധനയുമായി വന്നിട്ടില്ല."

അതിനാൽ, ഈ ആയത്ത്  മരണപ്പെട്ട മഹാന്മാരോട് ഇസ്തിഗാസ ചെയ്യാമെന്ന് തെളിയിക്കുന്നില്ല,

സലഫുകൾ ആരും അങ്ങനെ പറഞ്ഞിട്ടുമില്ല.

സഹോദരൻ:

ചോദ്യം നമ്പർ no.1.

നാം നിങ്ങൾക്ക് മുമ്പ് അയച്ച ദൂതന്മാരുടെ ഗ്രന്ഥങ്ങൾ നിന്ന് എന്ന് ആ ആയത്തിൽ എവിടെയാണ് ഉള്ളത്...?

ചോദ്യം,2 .

മുൻ വേദഗ്രന്ഥം ഇറക്കപ്പെട്ട ഏത് സമൂഹമാണ് നബി സല്ലല്ലാഹു അലൈഹിവസല്ലമയുടെ കാലത്തെ ജീവിച്ചിരുന്നത്. .?

അപ്പോൾ അതിനുമുമ്പ് നാല് ഗ്രന്ഥവും നാല് പ്രവാചകന്‍ മാരെയും മാത്രമാണോ അല്ലാഹു പ്രബോധനത്തിന് വേണ്ടി അയച്ചത്...?

തഫ്സീർ തബരിയുടെ ആ ഇബാറത്ത് പേജ് നമ്പർ സഹിതം പോസ്റ്റ് ചെയ്യൂ നോക്കട്ടെ.

തൗറാത്ത് : മൂസ നബിക്ക അവതരിച്ചത്

സബൂർ: ദാവൂദ് നബിക്ക് അവതരിച്ചത്

ഇഞ്ചീൽ: ഈസ നബിക്ക് അവതരിച്ചത് പിന്നെ ഖുർആൻ, ഈ പറയപ്പെട്ട വേദക്കാരിൽ

മുഹമ്മദ് നബിയുടെ കാലത്ത് ജീവിച്ചിരുന്ന സമൂഹം ആരെല്ലാമാണ് അത് നിൻറെ തൊള്ള പറ്റുകയില്ല ഇസ്ലാമിക പ്രമാണം കൊണ്ട് മറുപടി പറയണം ഇതിൽ അവസാനം അയക്കപ്പെട്ട പ്രവാചകനും ആരാണ് ...?

ആ ജനതയുടെ എത്ര കൊല്ലങ്ങൾക്ക് ശേഷമാണ് മുഹമ്മദ് നബി സല്ലല്ലാഹു അലൈഹിവസല്ലം ജനിക്കുന്നത് നബി ജനിക്കുന്ന സമയത്ത് ഈ മുൻകഴിഞ്ഞ സമൂഹമെല്ലാം ജീവിച്ചിരുന്നോ..?

ഈ, അയക്കപ്പെട്ട വേദഗ്രന്ഥത്തിൽ ജീവിച്ചിരുന്ന ഏത് സമൂഹമാണ് അന്ന് നിലവിലുണ്ടായിരുന്നത്..?

ആ സമൂഹം അന്ന് നിലവിൽ ഉണ്ടായിരുന്നു എന്ന് നിനക്ക് തെളിയിച്ചാൽ അല്ലേ അവരോട് ചോദിക്കാൻ പറ്റുകയുള്ളൂ. എന്നാലും നീ ഖുർആൻ അംഗീകരിക്കുകയില്ല അല്ലേ.

എന്റെ മറുപടി:

നിങ്ങൾ ഉന്നയിച്ച ചോദ്യങ്ങൾ വിഷയത്തിൽ നിന്ന് പുറത്താണ്.

എന്റെ വാദം വളരെ വ്യക്തമാണ്:

സൂറത്തു സുഖ്‌റുഫ് 43:45-ലെ "നിനക്കു മുമ്പ് നാം അയച്ച നമ്മുടെ ദൂതന്മാരോട് ചോദിക്കുക" എന്ന ആയത്ത് മരണപ്പെട്ട പ്രവാചകന്മാരെ വിളിച്ച് ചോദിക്കണമെന്നതിന് തെളിവല്ല.

കാരണം തഫ്സീർ പണ്ഡിതന്മാർ ഈ ആയത്തിന്റെ അർത്ഥം വിശദീകരിച്ചിരിക്കുന്നു.

ഇമാം ത്വബരി رحمه الله പറയുന്നു:

"فاسأل كتب الذين أرسلنا من قبلك من الرسل"

"നിനക്കു മുമ്പ് അയക്കപ്പെട്ട റസൂലുകളുടെ ഗ്രന്ഥങ്ങളോട് ചോദിക്കുക" എന്നാണ് അർത്ഥം.

അതുപോലെ ഇമാം ബഗവി رحمه الله, ഇബ്നു അബ്ബാസ് رضي الله عنه, മുജാഹിദ്, ഖതാദ, ദഹ്ഹാക്, സുധ്ദി, ഹസൻ, മുകാതിൽ رحمهم الله എന്നിവർ പറഞ്ഞത്:

"അഹ്‌ലുൽ കിതാബിലെ വിശ്വാസികളോട് ചോദിക്കുക" എന്നാണെന്നാണ്.

പിന്നെ നിങ്ങൾ ചോദിക്കുന്നു:

"മുൻ വേദഗ്രന്ഥങ്ങളുടെ സമൂഹം നബി ﷺ യുടെ കാലത്ത് ജീവിച്ചിരുന്നോ?"

ഉത്തരം: അതെ.

യഹൂദന്മാരും ക്രിസ്ത്യാനികളും നബി ﷺ യുടെ കാലത്ത് ജീവിച്ചിരുന്നു. ഖുർആനിൽ തന്നെ "അഹ്‌ലുൽ കിതാബ്" എന്ന പേരിൽ അവരെ അഭിസംബോധന ചെയ്തിട്ടുണ്ട്.

മദീനയിലെ യഹൂദ ഗോത്രങ്ങൾ, നജ്‌റാനിലെ ക്രിസ്ത്യാനികൾ തുടങ്ങിയവർ അതിന് തെളിവാണ്.

അതുകൊണ്ട് ഇമാം ബഗവി رحمه الله പറഞ്ഞ:

"سل مؤمني أهل الكتاب"

(അഹ്‌ലുൽ കിതാബിലെ വിശ്വാസികളോട് ചോദിക്കുക)

എന്ന വിശദീകരണത്തിൽ യാതൊരു പ്രശ്നവുമില്ല.

ഒരു പ്രധാന ഉപദേശം കൂടി:

ഇമാം ത്വബരി رحمه الله, ഇമാം ബഗവി رحمه الله എന്നിവരുടെ തഫ്സീറുകൾ ഞാൻ ഉദ്ധരിച്ചത് എന്റെ വ്യക്തിപരമായ അഭിപ്രായമല്ല.

അതിൽ ഇബ്നു അബ്ബാസ് رضي الله عنه, മുജാഹിദ് رحمه الله, ഖതാദ رحمه الله, ദഹ്ഹാക് رحمه الله, സുധ്ദി رحمه الله, ഹസൻ അൽ-ബസ്വരി رحمه الله തുടങ്ങിയ സലഫുകളുടെ അഭിപ്രായങ്ങളാണ് ഉദ്ധരിക്കപ്പെട്ടിരിക്കുന്നത്.

അതിനാൽ ഈ തെളിവുകളെ പരിഹസിക്കുകയോ അവഹേളിക്കുകയോ ചെയ്യുന്നത് വളരെ അപകടകരമായ കാര്യമാണ്.

കാരണം അല്ലാഹു ഖുർആനിൽ സഹാബികളെ പ്രശംസിക്കുകയും അവരുടെ മാർഗം പിന്തുടരാൻ കൽപിക്കുകയും ചെയ്തിട്ടുണ്ട് (തൗബ 9:100).

അതിനാൽ ചർച്ചകളിൽ വികാരത്തിനോ പരിഹാസത്തിനോ പകരം, സലഫുകൾ ഈ ആയത്തിനെ എങ്ങനെ മനസ്സിലാക്കി എന്നതാണ് നോക്കേണ്ടത്.

അതിനാൽ ആദ്യം നിങ്ങൾ മറുപടി പറയേണ്ടത്:

നിങ്ങൾക്ക് വ്യത്യസ്തമായ അഭിപ്രായമുണ്ടെങ്കിൽ, ഈ ആയത്തിൽ നിന്ന് മരണപ്പെട്ട പ്രവാചകന്മാരെ വിളിച്ച് ചോദിക്കാം അല്ലെങ്കിൽ അവരോട് ഇസ്തിഗാസ ചെയ്യാം എന്ന് പറഞ്ഞ ഒരു സഹാബിയുടെയോ താബിഈയുടെയോ വ്യക്തമായ ഉദ്ധരണി കൊണ്ടുവരിക.

ഞാൻ ത്വബരി, ബഗവി തുടങ്ങിയ തഫ്സീറുകളിൽ നിന്ന് സലഫുകളുടെ വിശദീകരണം കൊണ്ടുവന്നിട്ടുണ്ട്.

അപ്പോൾ നമുക്ക് തെളിവുകളുടെ അടിസ്ഥാനത്തിൽ വിഷയം പരിശോധിക്കാം ഇൻ ഷാ അല്ലാഹ്.

സഹോദരൻ:

നീ പറയുന്നു പ്രവാചകന്മാരോട് ചോദിക്കാൻ പറഞ്ഞിട്ടില്ല വേദഗ്രന്ഥങ്ങൾ ഇറക്കപ്പെട്ട ജനതയോട് ചോദിക്കാനാണ് പറഞ്ഞത് എന്ന്. അതാണ് നിന്നോട് ചോദിച്ചത് നബിസല്ലല്ലാഹു അലൈഹി വസല്ലമയുടെ കാലത്ത് വേദഗ്രന്ഥം ഇറക്കപ്പെട്ട ഏത് ജനതയാണ് ആ കാലഘട്ടത്തിൽ ഉണ്ടായിരുന്നത്  നിൻറെ വാദപ്രകാരം അവരോട് ചോദിക്കാൻ പറ്റുകയുള്ളൂ.

തൗറാത്ത് ,ഇഞ്ജീൽ മറിച്ചു നോക്കാനാണ് എന്ന് ആ ആയത്തിൽ ഏത് വരിയിലാണ് ഉള്ളത്..?

ആ അയത്തിൽ മുൻകഴിഞ്ഞ അമ്പിയാക്കളോട് ചോദിക്കാനല്ലേ ഉള്ളത്..?

എന്റെ മറുപടി:

എന്റെ വാദമല്ല.

 അതിന് തെളിവ് നൽകിയല്ലോ.

ഒന്ന് കൂടി വ്യക്തമാക്കാം.

നബി صلى الله عليه وسلم യിൽ നിന്ന് നേരിട്ട് പഠിച്ച, ഏറ്റവും ഉത്തമ തലമുറയെന്ന് വിശേഷിപ്പിക്കപ്പെട്ട, വഹ്‌യിന് സാക്ഷ്യം വഹിച്ച, ഖുർആന്റെ അർത്ഥവും വ്യാഖ്യാനവും പഠിച്ച സഹാബികളും, അവരിൽ നിന്ന് നേരിട്ട് പഠിച്ച താബിഈങ്ങളും ഈ ആയത്തിനെ എങ്ങനെ വിശദീകരിച്ചു എന്നത് തഫ്‌സീർ ബഗവിയിൽ നിന്ന് ഞാൻ രണ്ട് തവണ അയച്ചുതന്നതാണ്.

ആയത്തിന്റെ നേർക്കുനേരെയുള്ള പദങ്ങൾ മാത്രം നോക്കിയല്ല തഫ്‌സീർ നിർണ്ണയിക്കുന്നത്. മറിച്ച്, സലഫുകൾ നബി صلى الله عليه وسلم യിൽ നിന്ന് പഠിച്ചതും മനസ്സിലാക്കിയതുമാണ് തഫ്‌സീറുകളിൽ രേഖപ്പെടുത്തുന്നത്. ഈ അടിസ്ഥാനം മനസ്സിലാക്കണം. അല്ലെങ്കിൽ ഒരാൾ തെറ്റിപ്പോകും.

താഴെ മൂന്നാമത്തെ പ്രാവശ്യം ഇമാം ബഗവി رحمه الله യുടെ വാക്കുകൾ അയക്കുന്നു:

"മിക്ക തഫ്സീർ പണ്ഡിതന്മാരും പറഞ്ഞത്: പ്രവാചകന്മാരെ അയക്കപ്പെട്ടിരുന്ന അഹ്‌ലുൽ കിതാബിലെ വിശ്വാസികളോട് ചോദിക്കുക; റസൂലുകൾ തൗഹീദ് (ഏകദൈവാരാധന) അല്ലാതെ മറ്റെന്തെങ്കിലും സന്ദേശവുമായാണോ അവരുടെ അടുക്കൽ വന്നത് എന്ന്.

ഇതാണ് ഇബ്നു അബ്ബാസ് رضي الله عنه യിൽ നിന്ന് വന്ന എല്ലാ റിപ്പോർട്ടുകളിലുമുള്ള അഭിപ്രായം. മുജാഹിദ്, ഖതാദ, ദഹ്ഹാക്, സുധ്ദി, ഹസൻ, മുകാതിൽ എന്നിവർ പറഞ്ഞതും ഇതുതന്നെയാണ്."

പിന്നെ നിങ്ങൾ ചോദിച്ച ചോദ്യം:

"മുൻ വേദഗ്രന്ഥങ്ങളുടെ സമൂഹം നബി ﷺ യുടെ കാലത്ത് ജീവിച്ചിരുന്നോ?"

ഇതിനും ഞാൻ മറുപടി നൽകിയിട്ടുണ്ട്.

വീണ്ടും പറയുന്നു:

ഉത്തരം: അതെ.

യഹൂദന്മാരും ക്രിസ്ത്യാനികളും നബി ﷺ യുടെ കാലത്ത് ജീവിച്ചിരുന്നു. ഖുർആനിൽ തന്നെ അവരെ "അഹ്‌ലുൽ കിതാബ്" എന്ന പേരിൽ അഭിസംബോധന ചെയ്തിട്ടുണ്ട്.

മദീനയിലെ യഹൂദ ഗോത്രങ്ങളും നജ്‌റാനിലെ ക്രിസ്ത്യാനികളും അതിന് തെളിവാണ്.

അതുകൊണ്ടാണ് ഇമാം ബഗവി رحمه الله പറഞ്ഞത്:

"سل مؤمني أهل الكتاب"

(അഹ്‌ലുൽ കിതാബിലെ വിശ്വാസികളോട് ചോദിക്കുക) എന്ന്.

ഇപ്പോൾ എന്റെ ചോദ്യം വളരെ ലളിതമാണ്:

ഈ ആയത്തിൽ "മുൻകഴിഞ്ഞ അമ്പിയാക്കളെ നേരിട്ട് വിളിച്ച് ചോദിക്കുക" എന്നാണ് അർത്ഥമെന്ന് പറഞ്ഞ ഒരു സഹാബിയുടെയോ, താബിഈയുടെയോ, ഉദ്ധരണി നിങ്ങൾക്ക് കൊണ്ടുവരാൻ കഴിയുമോ?

ഞാൻ ഇബ്നു അബ്ബാസ് رضي الله عنه, മുജാഹിദ്, ഖതാദ, ദഹ്ഹാക്, സുധ്ദി, ഹസൻ, മുകാതിൽ رحمهم الله എന്നിവരുടെ വിശദീകരണം കൊണ്ടുവന്നിട്ടുണ്ട്.

നിങ്ങളും നിങ്ങളുടെ വാദത്തിന് ഒരു സലഫിന്റെ തെളിവ് കൊണ്ടുവരിക.

സഹോദരൻ:

മുഹമ്മദ് നബിയുടെ ജനനത്തിന് മുമ്പും ജീവിതകാലഘട്ടത്തും യഹൂദികളും ക്രിസ്ത്യാനികളും ഉണ്ട് അത് ഇവിടെയായിരും നിഷേധിച്ചിട്ടില്ല എന്നാൽ മുൻ വേദഗ്രന്ഥം ഇറക്കപ്പെട്ടപ്പോൾ ജീവിച്ചിരുന്നഒരു സമൂഹവും നബിയുടെ ആ കാലഘട്ടത്തിൽ ജീവിച്ചിരുന്നില്ല.

ഇമാം  ത്വബരിക്ക് എന്തേ രണ്ട് അഭിപ്രായം ഉണ്ടോ ഒരു ഇമാം എങ്ങനെയാണ് ഒരു ആയത്ത് വിശദീകരിച്ചു ഒരേ കാര്യത്തിൽ രണ്ടഭിപ്രായത്തിലെത്തുന്നത്...?

നീ പറയുന്നത് ഇമാം ത്വബിരിപറഞ്ഞു മുൻ കഴിഞ്ഞുപോയ പ്രവാചകന്മാരോട് ചോദിക്കാൻ അല്ല മുൻ കഴിഞ്ഞ വേദഗ്രന്ഥങ്ങൾ ഇറക്കപ്പെട്ട ജനതയോട് ചോദിക്കാൻ ഞണ് എന്ന് അതിന് നീ തെളിവും കൊണ്ടുവന്നു അതേ ത്വബരി തന്നെ വേറൊരു ഇബാറത്ത്ൽ പറയുന്നു.

ഇമാം ത്വബരി മറ്റൊരു വ്യത്യസ്തമായ അഭിപ്രായം രേഖപ്പെടുത്തുന്നു.

 وَقَالَ آخَرُونَ: بَلِ الَّذِي أُمِرَ بِمَسْأَلَتِهِمْ ذَلِكَ الْأَنْبِيَاءُ الَّذِينَ جُمِعُوا لَهُ لَيْلَةَ أُسْرِيَ بِهِ بِبَيْتِ الْمَقْدِسِ

الكتاب: تفسير الطبري (20/605)

الطبري، أبو جعفر (224-310هـ ، 839 - 923م).

ബൈത്തുൽ മുഖദ്ദസിൽ ഇസ്രാഇന്‍റെ വേളയില്‍  ഒരുമിച്ചുകൂടിയ അമ്പിയാക്കളോട്  ചോദിക്കാൻ ആണ് പറഞ്ഞത് എന്ന്.

ഒരു ആയത്തിൽ ഒരു ഇമാമീന് എങ്ങനെയാണ് വ്യത്യസ്തമായ രണ്ട്അഭിപ്രായം വരുന്നത്...?.

എന്റെ മറുപടി:

നിങ്ങൾ പറഞ്ഞത്:

"മുൻ വേദഗ്രന്ഥം ഇറക്കപ്പെട്ടപ്പോൾ ജീവിച്ചിരുന്ന ഒരു സമൂഹവും നബി ﷺ യുടെ കാലഘട്ടത്തിൽ ജീവിച്ചിരുന്നില്ല."

ഇമാം ബഗവി رحمه الله യും ഇബ്നു അബ്ബാസ് رضي الله عنه യും മുജാഹിദ്, ഖതാദ തുടങ്ങിയ സലഫുകളും പറഞ്ഞത്:

"سل مؤمني أهل الكتاب"

(അഹ്‌ലുൽ കിതാബിലെ വിശ്വാസികളോട് ചോദിക്കുക) എന്നാണ്.

അവർ പറഞ്ഞത്:

"മൂസാ عليه السلام യുടെ കാലത്ത് ജീവിച്ചിരുന്ന ആളുകളോട് ചോദിക്കുക" എന്നല്ല.

മറിച്ച്,

"അവരുടെ വേദഗ്രന്ഥങ്ങളിൽ വിശ്വസിക്കുന്ന അഹ്‌ലുൽ കിതാബിനോട് ചോദിക്കുക"

എന്നാണ്.

ഖുർആനിൽ തന്നെ നബി ﷺ യുടെ കാലത്തുണ്ടായിരുന്ന യഹൂദന്മാരെയും ക്രിസ്ത്യാനികളെയും "അഹ്‌ലുൽ കിതാബ്" എന്ന് വിളിക്കുന്നുണ്ട്.

അപ്പോൾ സലഫുകളുടെ വിശദീകരണത്തിൽ ഒരു പ്രശ്നവുമില്ല.

യഹൂദന്മാരും ക്രിസ്ത്യാനികളും തൗറാത്തും ഇഞ്ചീലും അവകാശപ്പെടുന്നവരായിരുന്നു. അതിനാൽ അവരോട് ചോദിച്ചാൽ മുൻ പ്രവാചകന്മാർ തൗഹീദ് അല്ലാതെ മറ്റെന്തെങ്കിലും പഠിപ്പിച്ചിട്ടുണ്ടോ എന്ന് അവർ സാക്ഷ്യം പറയുമായിരുന്നു.

അതുകൊണ്ടാണ് ഇമാം ബഗവി رحمه الله പറഞ്ഞത്:

"റസൂലുകൾ തൗഹീദ് അല്ലാതെ മറ്റെന്തെങ്കിലും സന്ദേശവുമായാണോ വന്നത് എന്ന് അഹ്‌ലുൽ കിതാബിലെ വിശ്വാസികളോട് ചോദിക്കുക."

നിങ്ങൾ ഇപ്പോൾ ഉന്നയിച്ച കാര്യം, ത്വബരിക്ക് രണ്ട് അഭിപ്രായമോ എന്നത് എന്റെ വാദത്തിന് എതിരല്ല.

മറിച്ച്, തഫ്‌സീർ ഗ്രന്ഥങ്ങൾ എങ്ങനെ വായിക്കണം എന്നത് അടിസ്ഥാന വിഷയമാണ്.

ഇമാം ത്വബരി رحمه الله ഒരു ആയത്തിന്റെ തഫ്‌സീറിൽ പല അഭിപ്രായങ്ങളും ഉദ്ധരിക്കാറുണ്ട്. എല്ലാ അഭിപ്രായങ്ങളും അദ്ദേഹത്തിന്റെ സ്വന്തം അഭിപ്രായമാണെന്ന് അതിന് അർത്ഥമില്ല.

നിങ്ങൾ ഉദ്ധരിച്ച ഇബാറത്തിൽ അദ്ദേഹം പറയുന്നത്:

"മറ്റുചിലർ പറഞ്ഞു..."

(وقال آخرون)

എന്നാണ്.

അത് ഇമാം ത്വബരിയുടെ അന്തിമ നിലപാട് അല്ല; അദ്ദേഹം ഉദ്ധരിച്ച ഒരു അഭിപ്രായം മാത്രമാണ്.

എന്നാൽ നിങ്ങൾ മറച്ചുവെച്ചത് എന്താണ്?

ഇമാം ത്വബരി رحمه الله പിന്നീട് ഏത് അഭിപ്രായത്തെയാണ് വിശദീകരിക്കുകയും ശക്തിപ്പെടുത്തുകയും ചെയ്തിരിക്കുന്നത് എന്നതാണ്.

ഞാൻ ആദ്യം ഉദ്ധരിച്ച അദ്ദേഹത്തിന്റെ വാക്കുകൾ വ്യക്തമാണ്:

"فاسأل كتب الذين أرسلنا من قبلك من الرسل"

"നിനക്കു മുമ്പ് അയക്കപ്പെട്ട റസൂലുകളുടെ ഗ്രന്ഥങ്ങളോട് ചോദിക്കുക."

ഇത് ഇമാം ത്വബരി رحمه الله തന്നെ നൽകിയ വിശദീകരണമാണ്.

ഞാൻ ആവർത്തിച്ച് ചോദിച്ചത്:

ഈ ആയത്തിൽ നിന്ന് മരണപ്പെട്ട പ്രവാചകന്മാരെ വിളിച്ച് ചോദിക്കാം, അല്ലെങ്കിൽ അവരോട് ഇസ്തിഗാസ ചെയ്യാം എന്ന് പറഞ്ഞ ഒരു സഹാബിയുടെയോ താബിഈയുടെയോ ഉദ്ധരണി കൊണ്ടുവരിക.

ഇതുവരെ അതിന് നിങ്ങൾ ഒരു തെളിവും നൽകിയിട്ടില്ല.

ഇതുവരെ നിങ്ങൾ ഉദ്ധരിച്ചതെല്ലാം ആയത്തിന്റെ അർത്ഥത്തെക്കുറിച്ചുള്ള വിവിധ വിശദീകരണങ്ങളാണ്; മരണപ്പെട്ട അമ്പിയാക്കളെ വിളിച്ച് സഹായം തേടാമെന്ന തെളിവല്ല.

പിന്നീട് അദ്ദേഹം പ്രതികരിച്ചില്ല.

ഡോ: കെ. മുഹമ്മദ് സാജിദ്.