സലഫുകൾ ബിദ്അത്തുകാരോട് സൗഹൃദം സ്ഥാപിക്കരുതെന്ന് പറയുന്നത് പൊതുവായ മൻഹജാണ്. എന്നാൽ കുടുംബത്തിലെ ബിദ്അത്തുകാരെ ബഹിഷ്കരിക്കരുതെന്നും അവരെ ബഹുമാനിക്കണമെന്നും അവർ പഠിപ്പിച്ചു. കൂടാതെ, ചില ബിദ്അത്തുകാരെ സംബന്ധിച്ച് കപടവിശ്വാസികളെക്കുറിച്ചുള്ള ആയത്തുകളും അവർ ഉദ്ധരിച്ചിട്ടുണ്ട്.

സലഫുകൾ ബിദ്അത്തുകാരോട് സൗഹൃദം സ്ഥാപിക്കരുതെന്ന് പറയുന്നത് പൊതുവായ മൻഹജാണ്. എന്നാൽ കുടുംബത്തിലെ ബിദ്അത്തുകാരെ ബഹിഷ്കരിക്കരുതെന്നും അവരെ ബഹുമാനിക്കണമെന്നും അവർ പഠിപ്പിച്ചു. കൂടാതെ, ചില ബിദ്അത്തുകാരെ സംബന്ധിച്ച് കപടവിശ്വാസികളെക്കുറിച്ചുള്ള ആയത്തുകളും അവർ ഉദ്ധരിച്ചിട്ടുണ്ട്.

ഉസ്താദ് ഷംസി حفظه الله യോട് ചോദിക്കപ്പെട്ട ചില ചോദ്യങ്ങളും, അവയ്ക്ക് അദ്ദേഹം നൽകിയ മറുപടികളും ക്രോഡീകരിച്ചാണ് ഞാൻ ഈ വിഷയം അവതരിപ്പിക്കുന്നത്, إن شاء الله.  ഇതിൻ്റെ വീഡിയോ താഴെ :

ആദ്യം ചോദ്യങ്ങൾ :

"സലഫുകൾ എന്തുകൊണ്ട് ബിദ്അത്തുകാരുമായി, മതത്തിൽ പുതിയത് ഉണ്ടാക്കിയവരുമായി, അടുത്ത സൗഹൃദം സ്ഥാപിക്കരുത്, അവരിൽ നിന്ന് വിജ്ഞാനം സ്വീകരിക്കരുത്, ചില സാഹചര്യങ്ങളിൽ അവരെ ബഹിഷ്കരിക്കണമെന്നും പറയുന്നു?"

ഉസ്താദ് ഷംസി حفظه الله യുടെ മറുപടികൾ :

" ഇത് ഏതെങ്കിലും ഒരു വ്യക്തിയുടെ അഭിപ്രായമല്ല. സഹാബികളും താബിഈങ്ങളും അവരെ പിന്തുടർന്ന സലഫുസ്സ്വാലിഹീങ്ങളും വിശദീകരിച്ച പാത അഥവാ മൻഹജാണിത്.

എന്നാൽ അത് ഏതെങ്കിലും ഒരു വ്യക്തിയെ ഉദ്ദേശിച്ച് പറഞ്ഞതല്ല; സലഫുകളുടെ പൊതുവായ മൻഹജാണ്.

അതായത്, ഈ തത്വം വ്യക്തിപരമായ വൈരാഗ്യത്തിന്റെ അടിസ്ഥാനത്തിലോ, ഇഷ്ടാനിഷ്ടങ്ങളുടെ അടിസ്ഥാനത്തിലോ ഒരാളെ ലക്ഷ്യമാക്കി പ്രയോഗിക്കേണ്ട നിയമമല്ല. 

പൊതുവായ നിയമം എന്തെന്നാൽ, ബിദ്അത്തിൽ ഉറച്ചുനിൽക്കുകയും അതിലേക്ക് ആളുകളെ ക്ഷണിക്കുകയും ചെയ്യുന്നവരുമായി അടുപ്പമുള്ള സൗഹൃദവും സഹവാസവും ഒഴിവാക്കണം, കാരണം മനുഷ്യൻ അവന്റെ സുഹൃത്തിന്റെ സ്വാധീനത്തിന് വിധേയനാകും.

എന്നാൽ സലഫുകൾ അതോടൊപ്പം മറ്റൊരു കാര്യവും വ്യക്തമാക്കിയിട്ടുണ്ട്. ആദ്യം അത്തരം ആളെ ഉപദേശിക്കണം, സത്യത്തിലേക്ക് ക്ഷണിക്കണം, നല്ല രീതിയിൽ പെരുമാറണം. എന്നാൽ അവൻ ബിദ്അത്തിൽ ഉറച്ചുനിൽക്കുകയും അതിൽ നിന്ന് മടങ്ങാൻ വിസമ്മതിക്കുകയും ചെയ്താൽ, അപ്പോൾ അവനെ ബഹിഷ്കരിക്കുന്നത് സലഫുകളുടെ മൻഹജാണ്.

അതിനാൽ, "ബിദ്അത്തുകാരുമായി സൗഹൃദം സ്ഥാപിക്കരുത്" എന്നത് ഒരു പൊതുനിയമമാണ്. എന്നാൽ അത് പ്രയോഗിക്കുന്ന രീതി ഖുർആൻ, സുന്നത്ത്, സലഫുകളുടെ വിശദീകരണം, അതുപോലെ സാഹചര്യവും ഗുണദോഷവും പരിഗണിച്ചായിരിക്കണം.

അതുകൊണ്ടുതന്നെ മാതാപിതാക്കൾ ബിദ്അത്തുകാരാണെങ്കിൽ അവരെ ബഹുമാനിക്കണമെന്നും, അവരുടെ അവകാശങ്ങൾ നിറവേറ്റണമെന്നും സലഫുകൾ തന്നെ പഠിപ്പിച്ചിട്ടുണ്ട് . 

ബിദ്അത്ത്കാരൊടുള്ള ഈ സമീപനം,  അതിൻ്റെ ലക്ഷ്യം ദീനിനെ സംരക്ഷിക്കുകയും സമൂഹത്തെ തെറ്റായ ആശയങ്ങളിൽ നിന്ന് രക്ഷിക്കുകയും ചെയ്യുക എന്നതാണ്.

ഇതിന് അവർ ചരിത്രത്തിൽ നിന്നുള്ള ഉദാഹരണങ്ങൾ പറയാറുണ്ട്. 

ഇമ്രാൻ ഇബ്നു ഹത്താൻ ആദ്യം അഹ്‌ലുസ്സുന്നയിൽ ഉണ്ടായിരുന്ന ആളായിരുന്നു. പിന്നീട് ഒരു ഖാരിജി സ്ത്രീയെ വിവാഹം കഴിച്ചു. അവളുടെ സ്വാധീനത്തിൽ അദ്ദേഹം ഖവാരിജിന്റെ ആശയങ്ങൾ സ്വീകരിക്കുകയും പിന്നീട് മഹാനായ സഹാബി, അലി ഇബ്നു അബീ താലിബിനെ  رضي الله عنه വധിച്ച വ്യക്തിയെ പ്രശംസിക്കുകയും ചെയ്തു. തെറ്റായ കൂട്ടുകെട്ടിന്റെ അപകടം സലഫുകൾ ഈ സംഭവത്തിലൂടെ ഓർമ്മിപ്പിച്ചു.

അതുകൊണ്ടാണ് ചില സലഫുകൾ പറയാറുണ്ടായിരുന്നത്: "പാപം ചെയ്യുന്ന ഒരാളുടെ കൂടെ എന്റെ മകനെ കാണാനാണ് ഞാൻ കൂടുതൽ ഇഷ്ടപ്പെടുന്നത്; ബിദ്അത്തുകാരന്റെ കൂടെയല്ല." കാരണം പാപി അവൻ തെറ്റ് ചെയ്യുകയാണെന്ന് അറിയുന്നു. അത് കൊണ്ട് അവന് തൗബ ചെയ്യാം. എന്നാൽ ബിദ്അത്തുകാരൻ അവന്റെ പ്രവൃത്തി അല്ലാഹുവിലേക്ക് അടുപ്പിക്കുന്ന ആരാധനയാണെന്നാണ് കരുതുന്നത്. അത് കൊണ്ട് തൗബ ചെയ്യുക ഇല്ല. അതുകൊണ്ടാണ് ബിദ്അത്ത് കൂടുതൽ അപകടകരമാണെന്ന് അവർ മുന്നറിയിപ്പ് നൽകിയത്.

നബി ﷺ പറഞ്ഞു:

"ഒരു മനുഷ്യൻ അവന്റെ അടുത്ത സുഹൃത്തിന്റെ മതത്തിലായിരിക്കും. അതിനാൽ നിങ്ങളിൽ ഓരോരുത്തരും ആരെയാണ് സുഹൃത്താക്കുന്നതെന്ന് നോക്കട്ടെ."

അതുകൊണ്ട് സലഫുകൾ ബിദ്അത്തുകാരിൽ നിന്ന് അറിവ് സ്വീകരിക്കുന്നതിലും, അവരുടെ സ്വാധീനത്തിന് വിധേയമാകുന്ന അടുപ്പമുള്ള സൗഹൃദത്തിലും താക്കീത് ചെയ്തിരുന്നു.

എന്നാൽ ഇതുകൊണ്ട് എല്ലാ ബന്ധങ്ങളും വിച്ഛേദിക്കണമെന്നല്ല അർത്ഥം. മാതാപിതാക്കൾ ബിദ്അത്തുകാരാണെങ്കിൽ പോലും, അവരെ ബഹുമാനിക്കണമെന്നും അവരുടെ അവകാശങ്ങൾ നിറവേറ്റണമെന്നും ഇസ്ലാം പഠിപ്പിക്കുന്നു. അവർ മുസ്ലിംകളായാലും അല്ലാത്തവരായാലും മാതാപിതാക്കളോടുള്ള നന്മ ഉപേക്ഷിക്കാനാവില്ല.

അതുപോലെ, ഒരു പ്രദേശത്ത് ബിദ്അത്ത്കാരുടെ മസ്ജിദ് മാത്രമാണുള്ളതെങ്കിൽ, അവിടെ പോയി നിസ്കരിക്കുന്നതിൽ പ്രശ്നമില്ലെന്ന് പണ്ഡിതന്മാർ വിശദീകരിച്ചിട്ടുണ്ട്. എന്നാൽ അവരുടെ ബിദ്അത്തുകൾ പഠിക്കുകയോ, അവരെ മാതൃകയാക്കുകയോ, അവരുടെ സ്വാധീനത്തിൽപ്പെടുകയോ ചെയ്യരുത്.

സലഫുകൾ ചില ബിദ്അത്തുകാരെ 'മുനാഫിഖുകൾ' എന്ന് വിശേഷിപ്പിച്ചിട്ടുണ്ട്. എന്നാൽ അത് എല്ലാ ബിദ്അത്തുകാരെയും കുറിച്ചുള്ള പൊതുവിധിയല്ല. ബിദ്അത്തിന്റെ സ്വഭാവം, അതിന്റെ ഗൗരവം, വ്യക്തി അതിലേക്ക് ക്ഷണിക്കുന്നുണ്ടോ, സത്യം വ്യക്തമായ ശേഷവും അതിൽ ഉറച്ചുനിൽക്കുകയാണോ തുടങ്ങിയ കാര്യങ്ങൾ പരിഗണിച്ചാണ് അവർ വിധി പറഞ്ഞത്. അതുകൊണ്ട് എല്ലാവരെയും ഒരേ രീതിയിൽ കാണാതെ, ഖുർആനും സുന്നത്തും സലഫുകളുടെ വിശദീകരണവും അനുസരിച്ചാണ് ഈ വിഷയം മനസ്സിലാക്കേണ്ടത്.

അതിനാൽ, ബിദ്അത്തുകാരിൽ നിന്ന് അകലം പാലിക്കണമെന്ന് സലഫുകൾ പഠിപ്പിച്ചത് വ്യക്തിവൈരത്തിനല്ല; ദീൻ സംരക്ഷിക്കാനും, ഹൃദയത്തെയും സമൂഹത്തെയും തെറ്റായ ആശയങ്ങളുടെ സ്വാധീനത്തിൽ നിന്ന് രക്ഷിക്കാനുമാണ്. അതാണ് സലഫുകളുടെ മൻഹജ് "

നമ്മൾ ഇവിടെ മനസ്സിലാക്കേണ്ടത് ബിദ്അത്തുകാരോട് എടുക്കുന്ന നിലപാട് , പൊതുസമൂഹത്തിലുള്ള ആളുകൾ ബിദ്അത്തുകാരോടുമായി ബന്ധപ്പെട്ടുപടുന്നവർ, ബിദ്അത്തിലേക്ക് ക്ഷണിക്കുന്ന ആളുകൾ , അതിൻറെ നേതാക്കൾ, കുടുംബത്തിലുള്ള ബിദ്അത്തുകാർ, ഇവരോടൊക്കെ വ്യത്യസ്‌തമായ സമീപനമാണ് സലഫി മന്ഹജ്

എന്നാൽ ചില സഹോദരന്മാർ എല്ലാവരോടും ഒരേ നിലപാട്എടുക്കുന്നതായിട്ട് കാണാം. ബിദ്അത്തുകാരുടെ നേതാക്കന്മാരോട്

എടുക്കേണ്ട ആ കടുത്ത രീതിയിലുള്ള സമീപനം. അത് കാരണം വലിയ കുഴപ്പങ്ങളാണ് സമൂഹത്തിൽ സംഭവിക്കുന്നത്.

ചില സഹോദരന്മാരുടെ അടുത്ത് ചില തെറ്റുകൾ സംഭവിച്ചാൽ പോലും അത് തെറ്റ തെറ്റാണെന്ന് ഉറപ്പിക്കാതെ തന്നെ ആ വ്യക്തിക്ക് തോന്നിയാൽ മതി അത് തെറ്റാണെന്ന്, പക്ഷേ അത് ഉറപ്പിക്കുന്നില്ല , സ്ഥിരീകരിക്കുന്നില്ല നസീഹത്ത് കൊടുക്കുന്നില്ല.

തെറ്റാണെങ്കിൽ നസീഹത്ത് കൊടുത്ത് അതിൻ്റെ തെളിവുകൾ,

സംസാരിക്കാതെ ബഹിഷ്കരിക്കുന്നു അകൽച്ച പാലിക്കുന്നു.

പിന്നെ അവൻ പോയ മസ്‌ജിദിൽ, അവൻ പോയി ഭക്ഷണം കഴിക്കുന്ന ഹോട്ടൽ ,അവിടേക്ക് പോലും പോകുന്നില്ലാത്ത ഒരു അവസ്ഥ വരുന്നു ഇതൊന്നും സലഫി മൻഹജ് അല്ല.

 പ്രത്യേകിച്ച് സഹോദരന്മാരുടെ അടുത്ത് തെറ്റ് സംഭവിച്ചാൽ  അതിനോടുള്ള നിലപാട് എന്താണെന്നൊക്കെ വ്യക്തമായിട്ട് സലഫി മൻഹജിൽ പഠിപ്പിക്കുന്നുണ്ട്.

അതുകൊണ്ട് നമ്മൾ ശ്രദ്ധിക്കണം സൂക്ഷിക്കണം. അല്ലെങ്കിൽ ഇത് സമൂഹത്തിൽ മാത്രമല്ല കുടുംബങ്ങളിൽ വരെ വലിയ കുഴപ്പങ്ങൾക്ക് കാരണമാകുന്നുണ്ട് എന്ന് നമുക്ക് ഇന്ന് പലയിടത്തും കിട്ടുന്ന വാർത്തകളിൽ നിന്ന് നമുക്ക് മനസ്സിലാകുന്നുണ്ട്.

ഡോ: കെ.മുഹമ്മദ് സാജിദ്.