മൊബൈലും ഇന്റർനെറ്റും: നിയന്ത്രണമില്ലാത്ത ഉപയോഗത്തിന്റെ അപകടം.

മൊബൈലും ഇന്റർനെറ്റും: നിയന്ത്രണമില്ലാത്ത ഉപയോഗത്തിന്റെ അപകടം.

ഷെയ്ഖ് ഡോ: അബ്ദുല്ലാഹ് അൽ ബുഖാരി حفظه الله യുടെ ശബ്ദം താഴെ വീഡിയോയിൽ കേൾക്കാം 

إن شاء الله 

ഷെയ്ഖിനോടുള്ള ചോദ്യം:

മൊബൈൽ ഫോണുകളും ഇന്റർനെറ്റും കാരണം പല ആളുകളും പാപത്തിലോ വിവിധ പാപങ്ങളിലോ അകപ്പെടുന്നു. ഇതിനെക്കുറിച്ച് എന്തെങ്കിലും ഉപദേശമുണ്ടോ?

ഉത്തരം:

ഇവയെല്ലാം മനുഷ്യനെ നന്മയിൽ നിന്ന് പിന്തിരിപ്പിക്കുന്ന കാര്യങ്ങളാണ്. ഇത്തരത്തിലുള്ള ഉപകരണങ്ങളിലും മറ്റും അമിതമായി മുഴുകിപ്പോകുന്നതിന്റെ പ്രത്യാഘാതങ്ങളിലൊന്നാണിത്.

നീ തുടർച്ചയായി അതിൽ മുഴുകിക്കൊണ്ടിരിക്കും; അങ്ങനെ ഒന്നിന് പിന്നാലെ മറ്റൊരു പാപത്തിൽ നീ വീണുകൊണ്ടിരിക്കും.

എന്നാൽ, നീ സ്വയം പാപത്തിലോ തെറ്റിലോ വീണുകൊണ്ടിരിക്കുകയാണെന്ന് പോലും മനസ്സിലാക്കുകയില്ല. 

ഒരു നോട്ടത്തിൽ നിന്ന് മറ്റൊരു നോട്ടത്തിലേക്ക്, ഒരു കേൾവിയിൽ നിന്ന് മറ്റൊരു കേൾവിയിലേക്ക്, ഒരു വായനയിൽ നിന്ന് മറ്റൊരു വായനയിലേക്ക്, ഒരു വീഡിയോയിൽ നിന്ന് മറ്റൊരു വീഡിയോയിലേക്ക്, അങ്ങനെ തുടർന്നുകൊണ്ടേയിരിക്കും.

അങ്ങനെ അവസാനം ഹൃദയത്തിന് എന്ത് സംഭവിക്കും? ഹൃദയത്തിന് തുരുമ്പ് പിടിക്കും. അത് തലകീഴായി മറിച്ചുവെച്ച ഒരു കുടം പോലെയായി മാറും. അറിയേണ്ടത് അറിയുകയില്ല; തെറ്റായതിനെ എതിർക്കുകയുമില്ല.

അവന്റെ ഹൃദയത്തിൽ നിറച്ചുവെച്ചിരിക്കുന്ന സ്വന്തം ഇച്ഛകളെ മാത്രം പിന്തുടരും. 

അല്ലാഹുവിൽ അഭയം തേടുന്നു.

സഹോദരാ, യഥാർത്ഥത്തിൽ പാപം ഉപേക്ഷിക്കണമെന്നാണ് നിനക്ക് ആഗ്രഹമെങ്കിൽ, ഞാൻ നേരത്തെ പറഞ്ഞതുപോലെ, നിന്റെ രഹസ്യങ്ങളിലും സ്വകാര്യ സാഹചര്യങ്ങളിലും, ആളുകളുടെ മുന്നിലുമെല്ലാം അല്ലാഹുവിനെ നിരീക്ഷിക്കുക.

നീ നിന്നോടുതന്നെ ചോദിക്കുക:

“ഇത് അല്ലാഹു ഇഷ്ടപ്പെടുന്ന കാര്യമാണോ? അതോ അല്ലാഹു വെറുക്കുന്ന കാര്യമാണോ?”

നീ അല്ലാഹുവിനെ നിരീക്ഷിക്കുകയും അവനെ ഭയപ്പെടുകയും ചെയ്താൽ, ഇതിലൂടെ നീ നിന്നെത്തന്നെ നശിപ്പിക്കുകയാണെന്ന് നിനക്ക് മനസ്സിലാകും. അപ്പോൾ നീ അതിൽ നിന്ന് അകന്നുനിൽക്കുകയും അത് ഉപേക്ഷിക്കുകയും ചെയ്യും.

നീ നിന്റെ ദേഹേച്ഛയോട് പോരാടി അതിനെ എതിർത്ത് അനുസരണത്തിൽ നിലകൊള്ളുമ്പോൾ, അനുസരണത്തിന്റെ ആനന്ദം നീ അനുഭവിക്കും. 

അല്ലാഹുവാണെ, നീ അതിന്റെ മാധുര്യം അനുഭവിക്കും. കാരണം, നീ പിശാചിനെയും അവന്റെ സഹായികളെയും പരാജയപ്പെടുത്തുകയും അവന്റെ പ്രേരണയെ എതിർക്കുകയും ചെയ്തിരിക്കുന്നു.

ഈ പാപത്തിൽ വീഴാൻ അവന് നിന്നിൽ പ്രതീക്ഷയുണ്ടായിരുന്നില്ല; നിന്നിൽ നിന്ന് രേഖപ്പെടുത്തപ്പെടുന്ന ഒരു പാപം നേടാനും അവന് സാധിച്ചില്ല.

എന്നാൽ, ഇങ്ങനെ തുടർച്ചയായി ഇന്റർനെറ്റിൽ മുഴുകിപ്പോകുന്നത്, ഈ ഇന്റർനെറ്റ് ലോകം അധമത്വങ്ങളും വിവിധ തരത്തിലുള്ള വിശ്വാസപരമായ അധഃപതനങ്ങളും കൊണ്ട് നിറഞ്ഞതാണ്.

അവർ ആളുകളുടെ വിശ്വാസങ്ങളെ നശിപ്പിച്ചുകൊണ്ടിരിക്കുന്നു, ജഹ്മികൾ, മുഅ്തസിലികൾ, അശ്അരികൾ, മുർജിഅകൾ, ഖവാരിജുകൾ, അങ്ങനെ ഇനിയും അനേകം വിഭാഗങ്ങൾ ".

ഷെയ്ഖിന്റെ മുന്നറിയിപ്പ് മൊബൈൽ ഫോണുകളുടെയും ഇന്റർനെറ്റിന്റെയും ഹാനികരവും നിയന്ത്രണമില്ലാത്തതുമായ ഉപയോഗത്തിനെതിരെയാണ്; ഈ സാങ്കേതികവിദ്യകളുടെ എല്ലാ ഉപയോഗങ്ങളും സ്വതവേ നിരോധിതമോ ഹാനികരമോ ആണെന്നല്ല അദ്ദേഹം പറയുന്നത്.

ഡോ: കെ. മുഹമ്മദ് സാജിദ്.